Loading article content...
மருத்துவச் செலவுகள் ஆண்டுதோறும் அதிகரித்து வருகின்றன. தற்போதைய வாழ்க்கைச் சூழலில் உடல்நலப் பிரச்சனைகள் மற்றும் விபத்துகள் ஆகிய அவசரகால சூழல் எப்போது ஏற்படும் என்பதை முன்கூட்டியே கணிக்க முடியாது. இந்நிலையில் இன்றைய காலகட்டத்தில் மருத்துவக் காப்பீட்டுத் திட்டத்தை வைத்திருப்பது மிகவும் அவசியமாகிறது.
இருப்பினும், உங்கள் சூழ்நிலையைப் பொறுத்து, சிறந்த அடிப்படை மருத்துவக் காப்பீட்டுத் திட்டங்கள்கூட உங்கள் அனைத்து மருத்துவச் செலவுகளையும் ஈடுகட்டப் போதுமானதாக இல்லாமல் போகலாம். இத்தகைய சூழலில்தான் டாப்-அப் (Super Top-up health insurance) மருத்துவக் காப்பீட்டுத் திட்டம் கைகொடுக்கிறது. எனவே, டாப்-அப் மற்றும் சூப்பர் டாப் அப் ஆகிய மருத்துவக் காப்பீட்டுத் திட்டங்கள் குறித்தும் ஆகியவற்றுக்கிடையிலான வேறுபாடுகள் குறித்தும் எளிமையாகப் பார்ப்போம்.
மருத்துவக் காப்பீட்டில் டாப்-அப் (Top-up) என்றால் என்ன?
டாப்-அப் என்பது பாலிசிதாரர்கள் தங்களின் தற்போதைய மருத்துவக் காப்பீட்டுப் பாலிசியுடன் கூடுதலாகப் பெற்றுக்கொள்ளக்கூடிய ஒரு காப்பீட்டு வசதியாகும். இந்தத் திட்டங்கள், அடிப்படை மருத்துவக் காப்பீட்டுப் பாலிசி வழங்கும் காப்பீட்டு வரம்பிற்கு அப்பால் கூடுதல் நிதிப் பாதுகாப்பை வழங்குகின்றன.
அடிப்படை மருத்துவக் காப்பீட்டுப் பாலிசியின் காப்பீட்டு வரம்பு போதுமானதாக இல்லாதபோது, டாப்-அப் திட்டம் கூடுதல் காப்பீட்டுப் பாதுகாப்பை வழங்குகிறது. இதில் ஒவ்வொரு முறை கிளைம் செய்யும்போது, டிடக்டிபிள் தொகை கணக்கில் எடுத்துக் கொள்ளப்படும் என்பது குறிப்பிடத்தக்கது
சூப்பர் டாப்-அப் (Super Top-up) என்றால் என்ன?
சூப்பர் டாப்-அப் திட்டத்தில், ஒரு பாலிசி ஆண்டில் ஏற்படும் மொத்த தகுதியான மருத்துவச் செலவுகள் குறிப்பிட்ட டிடக்டிபிள் வரம்பைத் தாண்டிய பிறகு, சூப்பர் டாப் காப்பீட்டுப் பாதுகாப்பு கிடைக்கும்.
ஒரு பாலிசி ஆண்டில் ஏற்படும் மொத்த மருத்துவச் செலவுகளைக் கணக்கில் எடுத்துக்கொள்ளும். பலமுறை மருத்துவமனையில் அனுமதிக்கப்பட்டாலும், அந்த ஆண்டின் மொத்த தகுதியான மருத்துவச் செலவுகள் டிடக்டிபிள் வரம்பைத் தாண்டினால் காப்பீடு கிடைக்கலாம்.
சூப்பர் டாப்-அப்: முக்கிய அம்சங்கள்
சூப்பர் டாப்-அப் திட்டத்தின் முக்கிய அம்சங்கள் குறித்து தெரிந்து கொள்வோம்.
- ஒரு பாலிசி ஆண்டில் ஏற்படும் மொத்த மருத்துவச் செலவுகளைக் கணக்கில் எடுத்துக்கொள்ளும்.
- பலமுறை மருத்துவமனையில் அனுமதிக்கப்பட்டாலும், அந்த ஆண்டின் மொத்த தகுதியான மருத்துவச் செலவுகள் டிடக்டிபிள் வரம்பைத் தாண்டினால் காப்பீடு கிடைக்கலாம்.
- டிடக்டிபிள் வரம்பு ஆண்டின் மொத்த செலவுகளின் அடிப்படையில் கணக்கிடப்படலாம்.
- டாப்-அப் திட்டத்துடன் ஒப்பிடும்போது, சூப்பர் டாப்-அப் திட்டத்தின் பிரீமியம் சற்று அதிகமாக இருக்கலாம்.
உதாரணம்: உங்கள் சூப்பர் டாப்-அப் பிளானில் டிடக்டிபிள் வரம்பு ₹5 லட்சமாகவும், காப்பீட்டுத் தொகை ₹10 லட்சமாகவும் இருக்கிறது என வைத்துக்கொள்வோம்.
- முதல் முறை மருத்துவமனையில் சிகிச்சை பெற்ற தொகை ₹3 லட்சம் என்றால், இது டிடக்டிபிள் வரம்பிற்குள் வருவதால் உங்களது அடிப்படை மருத்துவக் காப்பீடு அல்லது சொந்தப் பணத்தின் மூலம் செலுத்த வேண்டும்.
- சில மாதங்களுக்குப் பிறகு மீண்டும் சிகிச்சை பெறும்போது ₹2 லட்சம் செலவாகிறது. இதுவும் மொத்த டிடக்டிபிள் வரம்பிற்குள் (₹3L + ₹2L = ₹5L) வந்துவிடும்.
- இதற்குப் பிறகு அதே ஆண்டில் மீண்டும் சிகிச்சை பெற வேண்டிய சூழல் ஏற்பட்டால், அப்போதிருந்து வரும் செலவுகளைச் சூப்பர் டாப்-அப் மூலம் அதிகபட்ச வரம்பு ( ₹2 லட்சம் ) வரை கிளைம் செய்து கொள்ளலாம்.
குறிப்பு: (காப்பீட்டு நிறுவனங்களின் விதிமுறைகளுக்கு ஏற்ப மாறுபடலாம் என்பதால் பாலிசி ஆவணங்களைக் விரிவாக ஆராய்வது அவசியம்).
சூப்பர் டாப்-அப் திட்டத்தை வாங்குவதன் நன்மைகள்
அடிப்படை காப்பீடு திட்டத்துடன் சூப்பர் டாப்-அப் திட்டத்தை வாங்குவதனால் இருக்கும் நன்மைகள் குறித்து பார்ப்போம்.
அதிக காப்பீட்டுப் பாதுகாப்பு
சூப்பர் டாப்-அப் மருத்துவக் காப்பீட்டுத் திட்டத்தின் மூலம், உங்கள் அடிப்படை மருத்துவக் காப்பீட்டுப் பாலிசியின் வரம்பிற்கு அப்பாலும் கூடுதல் காப்பீட்டுப் பாதுகாப்பைப் பெறலாம்.
குறைந்த பிரீமியம்
சூப்பர் டாப்-அப் திட்டங்கள், அடிப்படைப் பாலிசியின் காப்பீட்டுத் தொகையை நேரடியாக அதிகரிப்பதைவிட ஒப்பீட்டளவில் குறைந்த பிரீமியத்தில் கூடுதல் பாதுகாப்பை வழங்கக்கூடும்.
வரிச் சலுகைகள்
சூப்பர் டாப்-அப் மருத்துவக் காப்பீட்டிற்காகச் செலுத்தப்படும் பிரீமியம், பொருந்தக்கூடிய விதிமுறைகளுக்கு உட்பட்டு, வருமான வரிச் சட்டத்தின் பிரிவு 80D-ன் கீழ் வரிச் சலுகைக்குத் தகுதியுடையதாக இருக்கலாம்.
மன நிம்மதி
சூப்பர் டாப்-அப் திட்டத்தின் மூலம், எதிர்பாராத மருத்துவ அவசரநிலைகளின் போது கூடுதல் நிதிப் பாதுகாப்பு கிடைக்கும் என்ற மனநிம்மதி கிடைக்கும்.
டிடக்டிபிள் (Deductible Amount) என்றால் என்ன?
டாப்-அப் மருத்துவக் காப்பீட்டுத் (medical insurance) திட்டங்களில், டிடக்டிபிள் (Deductible) என்பது ஒரு முக்கியமான அம்சமாகும். உங்கள் டாப்-அப் திட்டம் செயல்பாட்டிற்கு வருவதற்கு முன்பு, உங்கள் சொந்தப் பணத்திலிருந்தோ அல்லது ஏற்கனவே உள்ள உங்கள் மருத்துவக் காப்பீட்டுத் திட்டத்தின் மூலமாகவோ செலுத்த வேண்டிய குறிப்பிட்ட தொகையே டிடக்டிபிள் அல்லது கழிக்கப்பட வேண்டிய தொகை ஆகும்.
உதாரணமாக, டிடக்டிபிள் தொகை ₹5 லட்சமாக இருந்தால், அந்த வரம்பான ₹5 லட்சத்தைத் தாண்டும் மருத்துவச் செலவுகளுக்கு டாப்-அப் திட்டம் காப்பீடு வழங்கும்.
டாப்-அப் ( Top-up ) Vs அடிப்படைத் திட்டம் ( Base Plan ) வேறுபாடு
மருத்துவக் காப்பீட்டில் அடிப்படைத் திட்டம் (Base Plan ) மற்றும் டாப்-அப் திட்டம் ( Top-up Plan) ஆகிய இரண்டும் மருத்துவச் செலவுகளைச் சமாளிக்க உதவும் வெவ்வேறு திட்டங்களாகும். இதில் அடிப்படைத் திட்டம் மற்றும் டாப்-அப் திட்டம் ஆகியவ்ற்றுக்கிடையேயான வேறுபாடு குறித்து தெரிந்து கொள்வோம்.
| மருத்துவச் செலவு | அடிப்படைத் திட்டம் | டாப்-அப் திட்டம் | விளக்கம் |
|---|---|---|---|
| ₹2 லட்சம் வரை | ( ₹2 லட்சம் வரை காப்பீடு திட்டம் ) 2 லட்சம் பிடித்தம் செய்யப்படும் |
தேவையில்லை ( டிடக்டிபிள் வரம்பு ₹ 2 லட்சம் டாப்-அப் பாலிசி ₹ 10 லட்சம் ) |
அடிப்படைத் திட்டம் செலவை ஈடுகட்டும் |
| ₹5 லட்சம் | பாலிசி விதிமுறைகளின்படி ₹2 லட்சம் வரை ( டிடக்டிபிள் வரம்பு ₹ 2 லட்சம் ) | தகுதி இருந்தால் மீதமுள்ள தொகை ( ₹3 லட்சம் ) ( டிடக்டிபிள் வரம்பு ₹ 2 லட்சம் டாப்-அப் பாலிசி ₹ 10 லட்சம் |
டிடக்டிபிள் மற்றும் claim விதிமுறைகள் பொருந்தும் |
| ₹10 லட்சம் | ₹2 லட்சம் வரை ( டிடக்டிபிள் வரம்பு ₹ 2 லட்சம் ) |
தகுதி இருந்தால் மீதமுள்ள தொகை ( ₹8 லட்சம் ) ( டிடக்டிபிள் வரம்பு ₹ 2 லட்சம் டாப்-அப் பாலிசி ₹ 10 லட்சம் |
பாலிசி வரம்பிற்குள் கூடுதல் பாதுகாப்பு கிடைக்கும் |
குறிப்பு: டாப்-அப் திட்டத்தில் டிடக்டிபிள் எவ்வாறு பொருந்தும் என்பது பாலிசியின் விதிமுறைகளைப் பொறுத்தது. மேற்கண்ட உதாரணம் டாப்-அப் திட்டத்தின் claim structure எளிமையாக விளக்குவதற்காக மட்டுமே. உண்மையான claim settlement பாலிசியின் விதிமுறைகள் மற்றும் நிபந்தனைகளுக்கு உட்பட்டது.
அடிப்படைத் திட்டம் Vs டாப்-அப் திட்டம் Vs சூப்பர் டாப்-அப் திட்டம்
மருத்துவக் காப்பீட்டில் அடிப்படைத் திட்டம், டாப்-அப் திட்டம் மற்றும் சூப்பர் டாப்-அப் திட்டம் ஆகியவ்ற்றுக்கிடையேயான வேறுபாடு குறித்து தெரிந்து கொள்வோம்.
| அம்சம் | அடிப்படைத் திட்டம் (Base Policy) | டாப்-அப் திட்டம் (Top-up Plan) | சூப்பர் டாப்-அப் திட்டம் (Super Top-up Plan) |
|---|---|---|---|
| செயல்படும் முறை | அடிப்படை காப்பீட்டு வரம்பிற்குள் மருத்துவச் செலவுகளை ஈடுகட்டும் | ஒவ்வொரு தனிப்பட்ட claim-ன் செலவும் குறிப்பிட்ட டிடக்டிபிள் வரம்பைத் தாண்டிய பிறகு டாப்-அப் காப்பீடு வழங்கலாம் | ஒரு பாலிசி ஆண்டில் ஏற்படும் மொத்த தகுதியான மருத்துவச் செலவுகள் டிடக்டிபிள் வரம்பைத் தாண்டிய பிறகு சூப்பர் டாப்-அப் காப்பீடு வழங்கலாம் |
| டிடக்டிபிள் (Deductible) | பொதுவாக இல்லை | ஒவ்வொரு கிளைமுக்கும் பொருந்தலாம் | ஒரு பாலிசி ஆண்டின் மொத்த செலவுகளின் அடிப்படையில் கணக்கிடப்படலாம் |
| பிரீமியம் | ஒப்பீட்டளவில் அதிகமாக இருக்கலாம் | பொதுவாக குறைவாக இருக்கலாம் | டாப்-அப் திட்டத்தை விட சற்று அதிகமாக இருக்கலாம் |
| பயன்பாடு | வழக்கமான மற்றும் பெரிய மருத்துவச் செலவுகளுக்கான அடிப்படைப் பாதுகாப்பு | ஒரு பெரிய தனிப்பட்ட மருத்துவச் செலவு ஏற்படும் சூழ்நிலையில் பயனுள்ளதாக இருக்கலாம் | ஒரு ஆண்டில் பலமுறை மருத்துவச் செலவுகள் ஏற்படும் சூழ்நிலையில் பயனுள்ளதாக இருக்கலாம் |
முடிவுரை
உங்கள் அடிப்படை மருத்துவக் காப்பீட்டுத் திட்டம் போதுமானதாக இல்லாத சூழ்நிலையில், கூடுதல் நிதிப் பாதுகாப்பைப் பெற டாப்-அப் அல்லது சூப்பர் டாப்-அப் திட்டங்கள் உதவியாக இருக்கலாம். எந்தத் திட்டத்தைத் தேர்வு செய்வது என்பது உங்கள் மருத்துவத் தேவைகள், குடும்ப உறுப்பினர்களின் எண்ணிக்கை, ஏற்கனவே உள்ள காப்பீட்டுத் தொகை, பட்ஜெட் மற்றும் எதிர்கால மருத்துவச் செலவுகள் போன்ற பல்வேறு காரணிகளைப் பொறுத்தது.
எனவே, டாப்-அப் அல்லது சூப்பர் டாப்-அப் திட்டத்தை வாங்குவதற்கு முன், டிடக்டிபிள், காப்பீட்டுத் தொகை, விலக்குகள் (exclusions), காத்திருப்பு காலம் (waiting period), சப் லிமிட்டுகள் (sub-limits) மற்றும் கிளைம் (claim) விதிமுறைகள் உள்ளிட்ட அனைத்து அம்சங்களையும் கவனமாகப் புரிந்துகொண்டு, உங்களுக்கு ஏற்ற திட்டத்தைத் தேர்வு செய்யுங்கள்.
பொறுப்புத் துறப்பு: அதிகாரப்பூர்வ பாலிசி ஆவணங்களைக் கொண்டு பாலிசி விவரங்கள் மற்றும் காப்பீட்டு வரம்புகளைச் சரிபார்ப்பது அவசியமாகும். மேலும், உங்கள் உடல்நலம் சார்ந்த விவரங்களை உறுதிப்படுத்திக்கொள்ள, தயவுசெய்து ஒரு மருத்துவ நிபுணரை அணுகவும்.
